मनोरंजन

फिल्म सरौतोले महिला शक्तीकरणको कथा बुलन्द गरेको छ : मन्त्री मगर

काठमाडौं – खानेपानी तथा सरसफाइमन्त्री विना मगरले नेताले बोलेर जनतालाई फैल्याउने चेतना भन्दा कलाकारले कला मार्फत प्रस्तुत गर्ने चेतनाको सन्देश बढी प्रभावकारी हुने बताएकी छन् । मंगलबार राजधानीमा आयोजित फिल्म ‘सरौतो’ को ट्रेलर लन्च कार्यक्रममा अतिथिका रुपमा पुगेकी मन्त्री मगरले भनिन् ‘फिल्म सरौतोले महिला शक्तिकरणको कथा बुलन्द रुपमा उठाएको छ । यसको विषयवस्तु राम्रो लागेर म पनि सहभागी भएकी हँु ।’

आफुले पनि महिला सशक्तिकरणको बिषय पहिल्यैदेखि उठाउँदै आएको बताएकी मन्त्री मगरले सारौतो फिल्म सबैले हेर्नुपर्ने फिल्म बनेको आफुले बुझेको बताइन् । मन्त्री मगरले नेपाली फिल्म र कलाकारिता समाजसँग पनि जोडिएको विषय भएकोले कलाकारले आफ्नो कला र सृजनामार्फत समाज निर्माणमा पनि योगदान पुर्याउनुपर्ने धारणा राखेकी थिइन् ।

कार्यक्रममा फिल्म ‘सरौतो’को ट्रेलर समेत देखाइएको थियो । २ मिनेट ३३ सेकेण्डको ट्रेलरमा फिल्मकी मुख्य अभिनेत्री सुमी मोक्तान एक्सन अवतारमा देखिएकी थिइन् । ट्रेलर हेरेपछि मन्त्री मगरले अभिनेत्री सुमीको एक्सन र अभिनयको समेत तारिफ गरेकी थिइन् ।

फिल्मले एक महिलाको संघर्षको कथा बोकेको ट्रेलरबाट अनुमान लगाउन सकिन्छ । फिल्ममा सुमी मोक्तान, सन्नी सिंह, विजय लामा, युवराज लामा, धिरेन शाक्य, आमिर गौतम, अरुणा कार्की, सुवाङ्गम शाह, मनिषा पुन मगरलगायतको पनि अभिनय छ । विराञ्जना इन्टरटेनमेन्ट, स्क्वायर वान क्रिएसन, राइजिङ्ग फिल्म्स एण्ड ग्लिटर स्टुडियोको ब्यानरमा निर्माण भएको फिल्ममा उत्तम हुमागाईंको छायांकन, निमेष श्रेष्ठको सम्पादन र शंकर महर्जनको एक्सन रहेको छ ।

राजनराज शिवाकोटी, पुष्पन प्रधान र कमल खत्रीको संगीत ‘सरौतो’ का लागि आफुले सांकेतिक भाषा सिक्न करिब ६ महिना बढी मिहिनेत गरेको अभिनेत्री सुमीले बताइन् । कार्यक्रममा कलाकार तथा निर्देशक दीपाश्री निरौला, जीतु नेपाल लगायतले फिल्मको सफलताका लागि शुभकामना दिएका थिए । फिल्म कार्तिक २२ गतेबाट प्रदर्शनमा आउँदैछ ।

Leave a Reply

Your email address will not be published. Required fields are marked *