प्रमुख समाचार

चट्याङ प्रतिरोधी र पहिरो पूर्वसूचना प्रणाली जडान

बैतडी : विपदको जोखिम कम गर्न दशरथचन्द नगरपालिकाले नगरपालिका परिसरमा चट्याङ प्रतिरोधी प्रणाली र पहिरो पूर्वसूचना प्रणाली जडान गरेको छ।

चट्याङबाट हुने क्षति कम गर्न चट्याङ प्रतिरोधी प्रणाली र पहिरोको जोखिम कम गर्न पहिरो पूर्वसूचना प्रणाली जडान गरिएको नगरपालिकाले जनाएको छ। युनिसेफ नेपालको सहयोगमा नेपाल रेडक्रस सोसाइटी शाखा बैतडी र हिमालय कन्जर्भेसन गु्रपको प्राविधिक सहयोगमा उक्त प्रणाली जडान गरिएको हो। परीक्षणका लागि नगरपालिका भवनको परिसरमा जडान गरिएको छ।

चट्याङबाट बच्नका लागि नगरपालिकाको परिसरमा चट्याङ प्रतिरोधी प्रणाली जडान गरिएको भूगर्भशास्त्री डा. रञ्जनकुमार दहालले बताए। ‘यो प्रणाली सस्तो छ,’ उनले भने, ‘यो प्रतिरोधी प्रणालीबाट ५० मिटर वरपर चट्याङको जोखिम हुँदैन।’

यस्तै, नगरपालिका भवन परिसरमै पहिरो पूर्वसूचना प्रणाली पनि जडान गरिएको छ। वर्षा भएको बेला पहिरो जान सक्ने सम्भावना भएमा घण्टी बज्ने प्रविधिसहित पहिरो पूर्वसूचना प्रणाली जडान गरिएको डा. दाहालले बताए। ‘पाइप र गुच्चाको प्रयोग गरेर यो प्रणाली जडान गरिएको होे,’ उनले भने, ‘वर्षाले जमिन भासिएमा गुच्चा खसेर घण्टी बज्ने र यसले पहिरोको संकेत गर्नेछ।’

यो प्रणाली प्रभावकारी भएमा अबको केही महिनापछि साइरन जडान गरिने जनाइएको छ। नगरपालिका परिसरमा राखिएको चट्याङ प्रतिरोधी प्रणाली र पहिरो पूर्वसूचना प्रणालीबाट विपद् जोखिम कम गर्न सहयोग पुग्ने जिल्ला विपद् व्यवस्थापन समितिका अध्यक्ष एवं प्रमुख जिल्ला अधिकारी आनन्द पौडेल बताउँछन्।

नेपाल रेडक्रस सोसाइटी शाखा बैतडीले नगरपालिकासँग मिलेर विपद् जोखिम न्यूनीकरण कार्यक्रम सञ्चालन गरिरहेको छ। यो प्रणाली सफल भएमा अन्य वडाहरुमा पनि बिस्तार गरिने रेडक्रसका कार्यक्रम संयोजक तेजप्रसाद पाण्डेले बताए।

Leave a Reply

Your email address will not be published. Required fields are marked *